Zëdhënësi i Departamentit Amerikan të Shtetit, Mark Toner, përmes një deklarate për shtyp i ka dhënë përgjigjje letrës së gjashtë kongresmenëve republikanë që kërkonin shkarkimin e ambasadorit të SHBA-së në Shkup nën pretendimin se ka bashkëpunuar me Fondacionin e George Sorosit.
Sipas Toner politika e Shteteve të Bashkuara në Maqedoni është të mbështesë integrimin euro-atlantik të vendit dhe reformat e nevojshme për përmbushjen e këtij qëllimi.
“Departamenti i Shtetit ka besim të plotë tek ambasada dhe ambasadori ynë në Maqedoni. Si mike e Maqedonisë, SHBA i nxit me forcë të gjitha palët që të respektojnë shtetin ligjor, proceset demokratike dhe angazhimet ndërkombëtare të Maqedonisë. Ne duam të shohim një Maqedoni të fortë në rrugën e saj drejt anëtarësimit në familjen euro-atlantike”, thuhet në deklaratën e Mark Toner.
Anëtari i Kongresit, Kristofer Smith paralajmëroi më herët hetim për politizimin e rolit të Ambasadës Amerikane në Maqedoni dhe i bëri thirrje Sekretarit të sapoemëruar të Shtetit, Reks Tillerson që ta shkarkojë ambasadorin Xhes Bejli.
Smith i ka kërkuar që nga mesi i janarit ambasadorit Bejli shpjegime mbi akuzat se Ambasada në Shkup punon në dobi të partive politike dhe financon projekte të Sorosit në këtë vend. (J.V/Shuplaka)
Discussion about this post