Deputetja demokrate Jozefina Topalli shprehet kundër bojkotit të zgjedhjeve, ndryshe nga kreu i partisë së saj, Lulzim Basha.
E ftuar në emisionin “Të Paekspozuarit” të Ylli Rakipit, Topalli deklaron se protesta është një fillim i mbarë, por është kundër bojkotit të zgjedhjeve.
“Nuk jam unë personi për të dhënë përgjigjen. Unë kam dhënë dorëheqjen, nuk jam as në organe dhe as në forumet e partisë. Unë jam një deputete e thjeshtë. Është një realitet dhe duhet bërë analiza e situatës në të cilën ndodhet vendi. Nuk jam dakord me zotin Bushati që zgjidhja e kësaj situate mund të realizohet përmes mospjesëmarrjes në zgjedhje. Nuk e besoj për 1000 arsye që i kam thënë.
Ishte një fillim i mbarë për një lëvizje që mund të çojë në një revolucion brenda forcave politike, në një përfaqësim më real brenda parlamentit, në një raport tjetër me elitën, ose në raport me kartën morale.
A mund të flitet për një kartë morale brenda politikës, medias e biznesit? Politika pa moral është një degradim.”, deklaroi Topalli.
Ndërkohë, lidhur me pjesëmarrjen e mijërave njerëzve në protest, deputetja tha se ata nuk kanë ardhur për PD-në, por për të dalë kundër kryeministrit Edi Rama. (D.D/Shuplaka)
