4 muaj nga nisja e krizës politike në vend, me djegien e mandateve nga ana e opozitës, dhe protestat e vazhdueshme të saj, sot është bërë dhe më e qartë se zgjedhjet lokale të 30 Qershorit do të shtyhen.
Me opozitën që e kishte një nga kërkesat e saj shtyrjen e zgjedhjeve, me gjermanët që e thanë si mundësi për zgjidhjen e krizës, sot fjalën e tij e tha dhe presidenti i vendit Ilir Meta. Kreu i shtetit në një deklaratë bërë publike për mediat, tha se Kushtetuta i lejon institucionit që ai drejton që të rishikojë datën e zgjedhjeve.
”Në këtë kuadër, shpreh gadishmërinë time institucionale, që në përputhje me kompetencën që më jep shkronja “gj” e nenit 92 të Kushtetutës, të rishikoj Dekretin për caktimin e datës së zgjedhjeve vendore dhe të dekretoj një datë tjetër për zhvillimin e tyre, në përputhje me vullnetin e shprehur të palëve politike”, shprehet Meta në deklaratën e tij. (Lexo ketu te plote)
Me këtë trinom për shtyrjen e zgjedhjeve, tashmë topi do t’i kalojë kryeministrit Edi Rama, dhe vullnetit të forcës politike që ai drejton. Rama është shprehur përmes tre letrave publike se ai është i gatshëm për dialog, dhe sot i hidhet poshtë dhe alibia që ka përdorur se data e zgjedhjeve nuk është në dorë të tij po të presidentit.
“U jam shumë falenderues miqve të Shqipërisë dhe partnerëve politikë të LB&PD në CDU/CSU, për vëmendjen e tyre ndaj situatës politike! Krejt dakord me gjithçka kanë shprehur publikisht dhe për nevojën e dialogut pa kushte. Koha nuk pret sepse 30 qershori s’është në dorën tonë!”, shkruante jo më larg se dje Rama.
Mbetet për t’u parë se cili do të jetë vullneti i tij, tashmë që presidenti deklaroi se është i gatshëm që të shtyjë datën e zgjedhjeve.
Të gjitha këto zhvillime vijnë një ditë përpara protestës tgjetër kombëtare të opozitës, e cila do të mbahet pasditen e nesërme, ku nga retorika e përdorur nga Basha apo Kryemadhi, do të kuptojmë shumëçka lidhur me mundësinë e arritjes së një marrëveshje politike.
(E.K/FAXWEB.AL)
Discussion about this post