Prokuroria e Posaçme kundër Korrupsionit dhe Krimit të Organizuar (SPAK) ka përfunduar hetimet dhe ka dërguar për gjykim një dosje që lidhet me një rrjet të madh ndërkombëtar droge, i përfshirë në trafikimin e sasive të mëdha të narkotikëve drejt Zvicrës dhe vendeve të tjera të Europës.
Në qendër të këtij hetimi qëndrojnë dy shtetas shqiptarë: Gëzim Bakalli, i njohur edhe me identitetin Shkëmbim Cërmanji, dhe Erjon Loci.
Të dy akuzohen si pjesë e një grupi të strukturuar kriminal, ku Bakalli ka pasur rolin e organizatorit dhe financuesit, ndërsa Loci ka ndihmuar në transportin dhe shpërndarjen e drogës në territorin zviceran.
Sipas SPAK, grupi ka qenë aktiv në trafikun e drogës nga viti 2018 deri në vitin 2024. Hetimi është zhvilluar në bashkëpunim me autoritetet e drejtësisë zvicerane dhe përmes përdorimit të metodave të veçanta të ndjekjes dhe komunikimeve të përgjuara në platforma të enkriptuara si “Sky ECC”, “Threema” dhe “Signal”.
Gjatë operacionit u sekuestruan 345 kg kokainë (me pastërti deri në 86%), 22 kg heroinë, 2 kg marihuanë, 10,000 tableta ecstasy, 1.000 kg kokainë të mbetur në tentativë për trafikim, armë zjarri dhe municion, si dhe orë luksoze, para, dokumente pronësie dhe telefona celularë.
Hetimet e deritanishme kanë çuar në procedimin penal të dhjetëra shtetasve shqiptarë dhe të huaj, ndërsa SPAK ka ndarë një pjesë të çështjes në një dosje të re për të identifikuar bashkëpunëtorë të tjerë që mund të jenë ende aktivë.
SPAK thekson se ky është një nga rastet më serioze të trafikimit të organizuar ndërkombëtar të drogës që është zbardhur përmes bashkëpunimit me autoritetet e huaja dhe përdorimit të teknologjisë së avancuar hetimore.
Në fund, SPAK kujton se të gjithë të dyshuarit konsiderohen të pafajshëm deri në një vendim përfundimtar nga gjykata.
