Policia e Kosovës shkatërroi një grup të strukturuar kriminal të trafikut të drogës, duke arrestuar 22 persona.
Banda kriminale u zbulua nga bisedat në aplikacionin SKY ECC, pas një hetimi disamujor nga autoritetet.
“Personat janë arrestuar nën dyshimet për kryerjen e veprës penale ‘krim i organizuar’, në lidhje me trafikimin e narkotikëve dhe pastrimit të parave. Veprat penale, të pandehurit dyshohen se i kanë kryer përmes aplikacionit ‘SkyECC’”, njoftuan autoritetet e drejtësisë.
Aksioni policor u zhvillua në Prishtinë, Prizren, Pejë dhe Gjilan, ku u angazhuan në terren rreth 60 efektivë dhe u bastisën në total 47 banesa. Gjatë kontrolleve janë sekuestruar prova të konsiderueshme materiale, lëndë narkotike, 129 makina, para cash dhe janë ngrirë mjete në llogari bankare në vlerë prej 400 mijë eurove.Gjithashtu, janë sekuestruar edhe “nëntë orë dore të markave të njohura, 36 armë të llojeve të ndryshme, mijëra fishekë të llojeve të ndryshme, një prese për paketimin e heroinës dhe kokainës, laptopë, telefona dhe dokumente të ndryshme”.
Operacioni “Qielli i Thyer” u mbështet nga autoritetet e Belgjikës, Francës, Holandës dhe EUROPOL-it, i cili ka siguruar koordinim ndërkombëtar policor.
