Policia e Shtetit, në bashkëpunim me autoritetet italiane, ka finalizuar operacionin ndërkombëtar të koduar “Alba Tibus”, duke shkatërruar një grup të strukturuar kriminal të përfshirë në trafikimin e drogës.
Si rezultat i këtij operacioni të koordinuar mes Drejtoria për Hetimin e Krimit të Organizuar, Drejtoria e Forcës së Posaçme Operacionale, Policia e Vlorës, Karabinieria e Romës dhe Interpol, u lokalizuan dhe u arrestuan tre shtetas shqiptarë të akuzuar për trafik droge në Itali.
Në pranga ranë:
- Anxhelo Ajazaj, 27 vjeç
- Klarens Dalipaj alias Dhrami, 30 vjeç
- Xhino Hamitaj, 30 vjeç
Ndërkohë, një tjetër anëtar i grupit, Eurel Liçaj, aktualisht vuan dënimin në burgun e Rrogozhinës.
Hetimet e Prokurorisë së Romës tregojnë se ky grup kriminal, që vepronte që prej vitit 2019, kishte trafikuar kanabis në Itali, kryesisht në Romë.
Njoftimi i policisë:
Finalizohet në Shqipëri dhe në Itali, operacioni ndërkombëtar i koduar “Alba Tibus”, për goditjen e një grupi të strukturuar kriminal për trafikim të lëndëve narkotike.
Operacioni në Shqipëri u finalizua nga Drejtoria për Hetimin e Krimit të Organizuar dhe Drejtoria e Forcës së Posaçme Operacionale në Departamentin Policisë Kriminale, në bashkëpunim me Drejtorinë Vendore të Policisë Vlorë, si dhe në koordinim me homologët italianë, me Zyrën e Interforcës Italiane në Shqipëri, Karabinierinë e Romës, Parioli, dhe me Drejtorinë e Interpolit.
Akuzohen për pjesëmarrje në një grup të strukturuar kriminal në Itali, për trafikim të Cannabisit, lokalizohen, kapen dhe vihen në pranga 3 shtetas shqiptarë.
Hetimet e përbashkëta identifikojnë dhe një tjetër pjesëtar të grupit, i cili aktualisht po vuan dënim në IEVP Rrogozhinë.
Në kuadër të operacionit ndërkombëtar “Alba Tibus.Al”, u vunë në pranga shtetasit A. A., 27 vjeç, K. D. alias K. Dh., 30 vjeç dhe Xh. H., 30 vjeç. Ata dhe shtetasi E. L. që aktualisht po vuan një dënim në IEVP Rrogozhinë, akuzohen në kuadër të një procedimi penal të iniciuar nga Prokuroria e Romës, se në vitin 2019, të organizuar si grup i strukturuar kriminal, kanë trafikuar në Itali (kryesisht në Romë), lëndë narkotike Cannabis Sativa.
Policia e Shtetit është e angazhuar dhe e vendosur për të vijuar bashkëpunimin me partnerët, për veprime të përbashkëta hetimore dhe operacionale, me qëllim goditjen e veprimtarive kriminale në fushën e krimit të organizuar dhe për kapjen e shtetasve të shpallur në kërkim ndërkombëtar.
