Katër shtetas shqiptarë kanë rënë në prangat e policisë nën akuzën e trafikimit të emigrantëve. Arrestimi i tyre u krye pak ditë pas arrestimit të katër shqiptarëve të tjerë në Britaninë e Madhe. Ata akuzohen se ishin pjesë e bandës që merrej me trafikimin e emigrantëve nga Shqipëria.
Të arrestuarit janë të moshave 28-41 vjeç. Bëhet e ditur se rrjeti i trafikantëve sillte rreth çdo javë kundrejt pagesave, grupe nga rreth 20 emigrantë nga Shqipëria.
“Si rezultat i bashkëpunimit me autoritetet belge, ne arritëm të përcaktojmë vendndodhjen dhe arrestimin e 4 personave që besohet se janë pjesë e një grupi të organizuar kriminal me bashkëpunëtorë të tyre në Belgjikë.”, është shprehur detektivi Paul Perry, i Agjencisë Kombëtare të Luftës kundër Krimit, NCA.
Të ndaluarit kanë dalë përpara Gjykatës së Ekstradimeve, Westmintser Magistrates Court, Londër dhe pritet që të ekstradohen në Belgjikë për hetime të mëtejshme.
Pavarësisht përpjekjeve të autoriteteve britanike për frenimin e emigracionit ilegal, Britania e Madhe vazhdon të jetë një destinacion i preferuar nga shqiptarët.
