Një tjetër operacion kundër trafikimit të lëndëve narkotike është finalizuar sot në Shqipëri, duke çuar në arrestimin e një 25-vjeçari që dyshohet se ishte përfshirë në trafikimin e kanabisit me përqindje të lartë THC nga Tajlanda.
Operacioni, i koduar “Destinacioni 4”, u realizua nga Seksioni për Hetimin e Narkotikëve, në bashkëpunim me Forcën e Posaçme Operacionale të DVP Tiranë, Komisariatin e Policisë Rinas dhe Filialin e Qendrës Tranzite të Postës Shqiptare.
Arrestimi i shtetasit Rei Sako, banues në Tiranë, u bë në flagrancë, ndërsa ai mbante një pako me 2 kilogramë lëndë të dyshuar narkotike kanabis, me një vlerë të përafërt prej 40,000 eurosh. Përveç lëndës narkotike, policia sekuestroi gjithashtu një shumë parash, celularë dhe sende të tjera me vlerë si prova të rëndësishme në hetim.
Hetimet për këtë rast vazhdojnë, me qëllim dokumentimin e plotë të aktivitetit kriminal dhe identifikimin e shtetasve të tjerë të dyshuar të përfshirë në këtë rrjet trafikimi.
Discussion about this post