Në fjalën e tij gjatë Konventës, kreu i Lëvizjes Socialiste për Integrim dhe njëherazi kryeparlamentari, Ilir Meta, preku çështjen e trafikut të drogës, e cila u vu në shënjestër të BBC-së në një reportazh të fundit të saj.
Meta theksoi se “Kanabisi” është një çështje shqetësuese për të cilën duhet të gjendet zgjidhje pasi vendi nuk mund të zhvillohet me kanabis. Ndaj, paraqitet nevoja e ngutshme që palët politike të realizojnë një pakt të ngjashëm me atë për reformën në drejtësi.
“Vendet e punës nuk hapen me kanabis. Shqipëria nuk zhvillohet me kanabis. Kemi detyrimin ta luftojmë atë. Duhet të dimë se nëse sot mbjellim kanabis, nesër do të korrim krimin e organizuar në të gjitha institucionet e shtetit dhe do të shndërrohet në një “boomerang” për të ardhmen e vendit tonë dhe atë të fëmijëve tanë. Nevojitet një konsensus i gjerë, duhet që politika të realizojë një pakt pozitë-opozitë.”, u shpreh Meta.
