Trageti me 500 pasagjerë ndërron drejtim dhe zbarkon në Bari, shkak moti i keq

Moti i keq ka shkaktuar probleme jo vetëm në transportin rrugor por edhe në atë detar.

Si pasojë e erërave të forta dhe të dallgëve të mëdha në det, në Portin e Durrësit është pezulluar lundrimi.

Trageti i linjës Durrës-Ankona me 500 pasagjerë, u detyrua të devijojë lundrimin në drejtim të Barit, pasi Porti i Ankonës ishte i mbyllur.

Sipas raportimeve, trageti i nisur nga Durrësi pasditen e së enjtes arriti në portin e Barit, por 100 prej pasagjerëve ndodhen ende në traget, pasi janë pa makina. Ata do të transportohen me autobusë për në Ankona. 

Kapiteneria ka urdhëruar që të mos dalin në det anijet e vogla për lundrim dhe as ato për peshkim, sepse në këto kushte që ofron moti, mund të rrezikojnë jetën. (D.D/Shuplaka)