Tragjedi në Nigeri, avioni bombardon gabimisht një kamp refugjatësh, mbi 100 të vdekur (VIDEO)

Tragjedi në Nigeri, ku një avion ushtarak ka bombarduar gabimisht një kamp refugjatësh.

Sipas “Mjekëve pa Kufij”, në sulm humbën jetën mbi 100 persona, ndërsa janë plagosur dhjetëra të tjerë. Mes viktimave ka edhe vullnetarë të organizatave humanitare.

Mjeti ajror po monitoronte zonën gjatë një misioni kundër rebelëve islamikë të Boko Haram pranë kufirit me Kamerunin.

Gjenerali Lucky Irabor, përgjegjës i operacionit kundër Boko Haram tha se është i papërcaktuar numri i viktimave dhe të plagosurve, mes të cilëve janë shumë punonjës humanitarë dhe nigerianë që punojnë si mjekë për organizatën “Mjekë pa Kufij” dhe për Komitetin Ndërkombëtar të Kryqit të Kuq. 

Gjenerali shtoi se është herët për të përcaktuar nëse bëhet fjalë për një gabim taktik apo gjeografik. Në çdo rast, nënvizoi ai, avioni nuk ka marrë shënjestër vullnetarisht mbi civilët dhe kampin, por për ngjarjen është hapur një hetim. (A.R/SHUPLAKA)