Detaje të reja dalin në dritë lidhur me ngjarjen tragjike që tronditi komunitetin mbrëmjen e kaluar në zonën e Shkopetit. Trupi i pajetë i 23-vjeçarit Renis Dobra u gjet pranë bregut të liqenit në orët e para të mëngjesit.
Sipas burimeve hetimore, Dobra u ndalua nga autorë të armatosur dhe të maskuar si punonjës policie, të cilët përdorën dhunë për ta detyruar të zbriste nga makina. Ata i kërkuan fillimisht të besonte se po kryenin një kontroll rutinë, por më pas situata mori një tjetër kahje.
Një automjet tjetër, që kalonte rastësisht pranë vendit të ngjarjes, u ndalua nga autorët, të cilët i kërkuan shoferit të largohej menjëherë, duke i treguar një qëndrim kërcënues.
Më pas, disa prej autorëve hipën në makinën e Dobrës, duke i thënë se do ta dërgonin në komisariat. Në vend të kësaj, ata e morën drejt zonës së Shkopetit, ku besohet se u ekzekutua dhe më pas trupi i tij u hodh pranë liqenit.
Trupi i 23-vjeçarit u zbulua mëngjesin e sotëm nga kalimtarë të rastësishëm. Hetimet janë në zhvillim e sipër për zbardhjen e plotë të ngjarjes dhe kapjen e autorëve.
