Pak ditë pas aksidentit të rëndë ajror që i mori jetën 76 personave, kanë nisur hetimet për zbardhjen e plotë të shkaqeve dhe rrethanave të ngjarjes. Mendohet se mbarimi i karburantit dhe defekti në impiantin elektrik janë bërë shkak për rrëzimin e avionit në të cilin po udhëtonin edhe lojtarët e skuiadrës braziliane Chapecoense.
Ndërkaq janë siguruar edhe mesazhet audio që piloti Miguel Alejandro Quiroga Murakami i ka dërguar qendrës së kontrollit. “”Nuk ka karburant”, “po dështojmë” dhe më pas duke bërtitur: “na ndihmoni”, “jemi duke rënë”. Pavarësisht përpjekjeve gjatë komunikimit me Kullën e Vrojtimit, avioni është rrëzuar. Në konferencën për mediat, shefi i Aviacionit Civil, konfirmoi rrëzimin e avionit si pasojë e mungesës së karburantit.
Ai theksoi se referuar rregullave të fluturimit, avioni duhet të ishte pajisur me karburant rezervë gjatë ndalesës transit, por avioni “Lamia” nuk e kishte bërë këtë. Kutia e zezë e avionit mësohet se është gjetur e padëmtuar, por mendohet se do të duhet rreth gjashtë muaj për të arritur në një përfundim të qartë lidhur me shkaqet që çuan në rrëzimin e avionit me 81 persona në bord.
