Tragjedia e trefishtë në Bulqizë, flet dëshmitari që gjeti të vdekur në banesë nënën me dy fëmijët: Çfarë pa afër trupave

Të tjera detaje janë zbuluar nga vdekja e nënës dhe dy fëmijëve të saj në Bulqizë, ndërkohë që vajza e mbijetuar ndodhet jashtë rrezikut për jetën tek spitali i “Traumës” në Tiranë.

Mësohet se tre anëtarët e familjes kanë ndërruar jetë ditën e enjte rreth orës 22:30, ndërkohë që hidhen poshtë nga të afërm helmimi nga gazi apo nga mangalli.

I kontaktuar nga Fax News, nëse kanë pasur ndonjë konflikt, daja i familjes ka deklaruar se ja ka lënë drejtësisë që të japë versionin zyrtar, ndërkohë që pret përgjigjen e ekspertizës ligjore.

Daja që i ka gjetur familjarët të vdekur në një intervistë për Fax News ka deklaruar po ashtu se pa afër trupave të pajetë një pjatë supë.

“Ushqimi i gjetur është marrë për analiza, ndërkohë që bombola e gazit ka qenë jashtë banesës”- u shpreh dëshmitari.

Trupat e pajetë të familjes Tolaj, Rajmonda, Rudina dhe Fatjon, kanë mbërritur dje në morgun e spitalit Rajonal të Dibrës, për t’iu nënshtruar ekspertizës mjeko-ligjore.

Ekspertët mjeko-ligjorë, qëndruan në banesën e tyre për sa kohë grupi hetimor kreu veprimet paraprake, ndërsa është dashur disa orë udhëtim deri në Peshkopi për shkak se Fshati Ostren i Madh ndodhet në kufi me Maqedoninë e Veriut në zonën e Gollobordës.

Mësohet se drejt Peshkopisë është nisur një ekip i ekspertizës mjekoligjore që do të asistojë në përcaktimin e shkaqeve të vërteta të tragjedisë së rëndë.

Fillimisht u raportua se vdekja e tre pjestarëve të familjes dhe plagosjes së vajzës tjetër kishte ardhur si pasojë e rrjedhjes së gazit në banesë, por mejku i zonës deklaroi se dritaret e banesës kishin qenë të hapura.

Megjithatë pritet ekspertiza mjeko-ligjore për të hedhur më tepër dritë mbi ngjarjen e rëndë që i mori jetën dy fëmijëve dhe nënës së tyre.

Policia ka dhënë vetëm moshën e nënës, e cila është 40 vjeç.Burime bëjnë me dije se vajza që ka vdekur ka qenë 17-vjeç, djali 13 vjeç, ndërkohë që vajza që ka mbetur e plagosur është vetëm 8 vjeç.

Njoftimi paraprak i policisë për ngjarjen:

Në Ostren, Bulqizë, është marrë informacion se në banesë janë gjetur pa shenja jete shtetasja R.T, rreth 40 vjeçe, dhe dy fëmijët e saj (vajza dhe djali), që dyshohet se janë helmuar nga bombola gazit.

Në gjendje të rëndë shëndetësore është dhe një pjestar tjetër i familjes ku po transportohet për në spital.

Grupi hetimor ka shkuar në vendngjarje dhe vijon hetimet për zbardhjen e ngjarjes.

(M.Q/Faxweb.al)