Një ngjarje e rëndë ka ndodhur në qytetin e Elbasanit. Një vajzë e re vetëm 18-vjeçare ka ndërruar jetë pas një ndërhyrje kirurgjikale në Spitalin Rajonal të qytetit.
Sakaq ka nisur procedimi penal për mjeken kirurge. Ndërhyrja kirurgjikale është kryer në datën 8 korrik, pra të shtunën.
18-vjeçarja me inicialet K.I mësohet se ka ndërruar jetë pak pas operacionit. Ende nuk dihet nga se vuante e reja.
Mjekja e identifikuar si J.K, 43-vjeçe akuzohet për mjekim të pakujdesshëm. Ndërkohë që familjarët e viktimës kanë hedhur akuza në drejtim të mjekëve.
Njoftimi i policise:
Specialistët për Krimet, në Komisariatin e Policisë Elbasan referuan materialet në Prokurori për proçedim penal në gjendje të lirë për veprën penale “Mjekimi i pakujdesshëm” në ngarkim të shtetases J.K., 43 vjeçe, banuese në Elbasan.
Ajo duke qenë me profesion mjeke kirurge në spitalin e Elbasanit, në datë 8 korrik 2017, kreu një ndërhyrje kirurgjikale tek pacientja K.I.. Pacientja K.I, ndërroi jetë pak pas operacionit.
Sipas kallëzimeve të familjarëve dyshohet se 18 vjeçarja ka humbur jetën si pasojë e mjekimit të pakujdesshëm.
Grupi hetimor po kryen veprime të mëtejshme në bashkëpunim me ekspertët mjeko–ligjorë për përcaktimin e shkakut të vdekjes.
Materialet i kaluan Prokurorisë së Rrethit Gjyqësor Elbasan për veprën penale “Mjekimi i pakujdesshëm” parashikuar nga neni 96 i Kodit Penal.
(E.K/SHUPLAKA)
Discussion about this post