Klotilda Ferhati, anëtare e Partisë Socialiste në Këshillin Bashkiak të Tiranës, ka mbështetur idenë e hedhur nga ish-kryetari i bashkisë Lulzim Basha për ndërtimin e një trami në kryeqytet.
Gjatë një interviste për “News 24”, e pyetur për problemet serioze me të cilat përballet trafiku në Tiranë, u shpreh se: “Do të ishte shumë mirë të kishim një tram. Problemi me tramin nuk është se nuk është një mjet i mirë transporti, por në kushtet që ne jemi leverdisshmëria është e pamundur për shkak të të ardhurave që ka bashkia. Në kohë afatgjatë ai mbetet një projekt i mundshëm dhe është si gjurmë në plan”.
Këshilltarja socialiste shkoi edhe më tej kur tha se, në planin e ri urbanistik të Tiranës, është parashikuar edhe gjurma e ndërtimit të tramit, një projekt i cili sipas saj nëse qeveria shqiptare do të ketë para të mjaftueshme do të ishte shumë mirë ta vinte në jetë.
Ish-kryebashkiaku Lulzim Basha e reklamoi ndërtimin e tramit në Tiranë si një prej pikave kryesore të programit të tij qeverisës, por sipas ish-administratës që ai drejtonte, me ardhjen e socialistëve në pushtet u bllokuan të gjitha financimet për projektet kryesore në Tiranë, përfshirë edhe atë të tramit. (A.R/SHUPLAKA)
Discussion about this post