Ndërmjetësuesi i marrëveshjes PS-LSI, vëllai i ministrit Lefter Koka, Leonard Koka, sqaron arsyet e shoqërimit të tij në komisiariatin e policisë.
Ai akuzohet për “Kundërshtim të forcave të policisë”, mirëpo Koka i ka mohuar këto akuza. Në një prononcim për “BW”, Koka ka akuzuar rëndë drejtorin e policisë së Durrësit Perlat Çullhaj se ai e ka përdorur për të larguar vëmendjen e medias dhe opinionit publik nga droga që ka kaluar në kufirin italian.
“Unë nuk kam kundërshtuar asnjë punonjës policie. Dua të them që Perlat Çullhaj më ka shoqëruar vetëm për të tërhequr vëmendjen nga droga që ka kaluar në kufi. Ma ka bërë edhe një vit më parë. Sa herë kalojnë 2-3 tonë drogë në kufi më shoqërojnë mua për të tërhequr vëmendjen e mediave dhe opinionit publik. Nuk habitem po të më shoqërojnë prapë”, sqaron Koka.
Leonard Kokës iu bllokua sot makina nga policia, për shkak se djali i tij u ndalua për shekje të kodit rrugor. Sipas policisë, ky bllokim i makinës është bërë rreth orës 13:15 të ditës së sotme. Fillimisht eflektivët e policisë kanë ndaluar makinën që drejtohej nga i biri por më pas aty ka mbërritur edhe vetë Leonard Koka. Djalit iu hoq leja e drejtimit nga patrulla e qarkullimit, ndërsa Koka mbeti në komisariat përreth tre orë me radhë. (D.D/Shuplaka)
