Tregonte vlerat e vajit të palmës, çudit ministri Çuçi: S’është i dëmshëm, njeriu vdes nga gjalpi i lopës (VIDEO)

Jo vetëm sektori i prodhimit por edhe Ministria e Buqësisë, e cila është dikasteri përgjegjës për këtë fushë kanë qenë në qendër të vëmendjes kohët e fundit pas skandaleve të shumta me produktet ushqimore të konsumit të përditshëm .

Mirëpo, të ndodhur në këtë varg problemesh ku tregtarët deklarojnë se kurrsesi nuk konsumojnë nga produktet që shesin për shkak të dozave të larta hormonale që ato kanë, apo produktet shtazore si djathi është me niseshte e aromatizues, ndërsa mishi i kafshëve të sëmura me brucelozë e turbekuloz bëhet sallam e vihet në konsum të njerëzve, ajo e cila i ka kaluar pritshmëritë e mundshme është deklarata e Ministrit të Bujqësisë, Bledi Çuçi.

I ftuar në studion e “Top Talk”, Ministri i Buqësisë Çuçi, njëherazi dhe përgjegjës për sigurinë ushqimore dhe produktet që konsumojnë qytetarët ka çuditur me deklaratën e tij se vaji i palmës nuk është një produkt i dëmshëm.

Madje Çuçi shkon edhe më tej duke u shprehur se ky lloj vaji s’duhet të cilësohet si cianur nga ana e qytetarëve.

Por përsa i përket vajit të palmës dhe “dobive” të tij, shumë studime të kryera nga Universitete më në zë Evropiane dhe botërore, e cilësojnë si një product kancerogjen, i cili kthehet në problem për personat gjatë konsumit të përditshëm duke shkatërruar qelizat e pankreasit të cilat prodhojnë insulin, si dhe shkaktuar dëme të pariparueshme  në trup, aq sa vendet e Bashkimit Evropian, por jo vetëm, e kanë rreptësisht të ndaluar përdorimin e tij.

Në lidhje me deklaratat e Çuçit ka reaguar edhe mjeku veteriner Ervin Resuli, i cili përmes një statusi në rrjetin social Facebook duke u shprehur: “Ja nje shembull ku injoranca nuk ka brire!”, ka ironizuar deklaratën e ministrit se, “Vaji i palmës përdoret në Europë dhe nuk të bën keq”, duke shtuar:
“Ju lutem, dikush t’i thote Ministrit Çuçi, qe Europa i rri larg vajit te palmes si djalli temjanit.”

 Deklaratat e ministrit Çuçi tha:

“Përdorimi i vajit të palmës nuk është i paligjshëm. Mund të bësh analizën e bulmetit dhe nëse të del me 30% me vaj palme dhe kur nuk është shënuar, atëherë këtu kemi të bëjmë me shkelje. Atëherë do më kritikosh se përse nuk e kam bërë punën unë si ministër. Po luani me shëndetin e njerëzve. Ore pi gjithë ditën, nuk të bën keq .Vaj palmës nuk është cianur. Vaji i palmës përdoret në Europë dhe nuk të bën keq. Po të hash gjalpë nga lopët zvicerane, vdes se është yndyrë e rëndë”.