Tregtimi i mishit në Tiranë, vetëm 20 % e produktit është i certifikuar

Vetëm 20 % e totalit të mishit që tregtohet në kryeqytet është i certifikuar.

Sipas një vëzhgimi të Ora Neës, mishi që tregtohet për konsum nuk i plotëson standartet e sigurisë.

Sipas përgjegjëses së sektorit veterinar në Bashkinë Tiranë, Hermiona Hajdini sqaron se janë vetëm 2 thertore të licencuara, në të cilat kanë veprim veterinerët e bashkisë.

“Veterineri përpos kontrolleve teknike, në moment që kafsha e therur është e pastër nga të gjitha sëmundjet, vulos karkasën dhe jep dhe certifikatën, e cila garanton konsumatorin që ky produkt është i sigurt për konsum human.”, shprehet Hajdini.

Sakaq përgjegjësja shton se duhen minimalisht 24 orë që mishi të pushojë.

“Gjatë kësaj periudhe, ndodhin një sërë procesesh kimike në mishin e therur. Mishi mund të jetë shumë i fortë në prerje, nuk zihet mirë, nuk ka kulluar plotësisht. Maturimi i tij rrit cilësinë e mishit.”, sqaron Hajdini. (D.D/Shuplaka)