Treni i linjës Milano-Bari, ka ndaluar në mes të rrugës, për shkak të një defekti të rëndë në impiantin e kondicionimit.
Mësohet se treni “Frecciarossa 9809”, i nisur nga Milano Centrale në orën 15:45 ishte nisur për Bari. Por një problem në impiantin e kondicionimit është bërë shkak që të ndalojë.
Pasagjerët e 11 vagonëve kanë mbetur në bord në temperatura të larta, mes tyre gra shtatzëna, të moshuar dhe fëmijë.
Një prej tyre ka treguar për TgCom24 makthin e këtij udhëtimi, tregon se policët i kanë ngjeshur në bankinë, pa i dhënë asnjë informacion dhe as një shishe ujë.
“Në tren është 50-60 gradë temperatura dhe treni ishte plot, kishte në bord edhe shumë persona të moshuar dhe gra shtatzënë.
Kur drejtuesit e trenit nuk ishin në gjendje të përballonin protestën e pasagjerëve, në stacion ka mbërritur policia.
Tani na kanë ngjeshur në bankinë, pa na dhënë as një shishe ujë apo ndonjë informacion. Na kanë bërë që të lëmë bagazhet në tren, kështu që nuk kemi asgjë. Na kanë thënë se duhet të nisemi pas 80 minutash por do jetë e vështirë. Të gjithë trenat që po kalojnë në Bolonja janë plot”, ka rrëfyer pasagjeri.
Mirëpo kjo nuk është hera e parë që ndodh një problem i tillë. I njëjti tren kishte pasur probleme edhe ditën e djeshme dhe kishte qëndruar në stacionin e Bolonjas. (D.D/Shuplaka)
Discussion about this post