Zëdhënësi i KFOR-it, nënkoloneli Max Barbacini, u ka bërë thirrje për vetëpërmbajtje palës kosovare dhe asaj serbe. Veç kësaj, KFOR ka kërkuar edhe angazhimin e dy vendeve në dialogun mes tyre.
Mëgjithatë, KFOR shprehet se është i gatshëm të ndërhyjë në çfarëdo situatë ku do të paraqitet e nevojshme.
Tensionet që ka shkaktuar treni ilegal serb në Kosovë, thuhet se ka kaluar të gjithë kufijtë e normalitetit të provokimeve të deritanishme serbe.
Ky rast, nga ekspertët e sigurisë në vend, po shihet si “luftënxitëse”, dhe që ka cenuar situatën e sigurisë në Kosovë. Madje, sipas tyre, në pikëpyetje është edhe vetë stabiliteti rajonal, shkruan “Zëri”.
Nga ana tjetër, Policia e Kosovës shprehet se nuk ka vend për shqetësime në nivel shtetëror për gjendjen e sigurisë. Sipas tyre, situata është e qetë dhe “e brishtë” në veri të Mitrovicës. (XH.A/SHUPLAKA)
Discussion about this post