Pas atentatin ndaj një 39 vjeçari ditën e djeshme në qytetin e Vlorës një tjetër ngjarje ka tronditur sot qytetin bregdetar. Sot në orët e para të mëngjesit një pako e dyshimtë me lëndë plasëse është gjetur në një mjet ‘GL’ me targa A 952 NA.
Mjeti ishte në pronësi të Bashkim Brahimaj, vëllait të Isuf Brahimaj i cili është vrarë në gusht të 2014 nga një shpërthim tritoli.
Fatmirësisht tritoli në mjetin e Bashkim Brahimaj nuk ka shpërthyer, dhe pritet mbërritja e forcave xheniere nga Tirana për të ndërhyrë.
Ky nuk është atentati i parë i bërë ndaj vëllezërve Isuf dhe Bashkim Brahimaj. Pista kryesore në të cilën po heton Policia është hakmarrja.
Vrasja e Isuf Brahimajt erdhi pas dy atentateve të dështuara. Dy vëllezërit merreshin me biznesin e dëmtimit po nuk kanë munguar as akuzat për përfshirje në rrjetin e drogës.
Detajet e policisë:
Në lagjen “Pavarësia”, rreth orës 08:00, në vendin e quajtur “Rruga e Çipajve”, në pjesën e poshtme të shasisë së një automjeti është konstatuar një sasi e dyshuar me lëndë eksplozive. Sasia e dyshuar e eksplozivit është vendosur nga jashtë automjetit tip Benz Fuoristradë me targë AA 952 NA, në pjesën e poshtme të shasisë poshtë shoferit.
Mjeti është në pronësi të shtetasit E.B., 44 vjeç, banues në Vlorë. Pritet mbërritja e forcave Xheniere nga Tirana, të bëjnë të mundur çmontimin e eksplozivit pa pasoja shpërthyese. Po punohet për zbardhjen e ngjarjes. (E.K/SHUPLAKA)
Discussion about this post