Fax News bën me dije se të enjtën rreth orës 02:35 pas mesnate, në derën e jashtme të banesës së shtetasit Adem Selimi, në fshatin Lazarat të Gjirokastrës, ka shpërthyer një sasi tritoli.
Bëhet me dije se nga shpërthimi i tritolit të vendosur tek dera nuk pati të lënduar, por vetëm dëme materiale.
Sasia e tritolit të vendosur dyshohet të jetë më shumë se 300 gramë. Lënda plasëse është vendosur tek dera brendshme e banesës duke shkaktuar edhe një gropë, siç shihet nga pamjet.
Mësohet se Adem Selimi është babai i Klodian Selimit, njërit prej të dënuarve me 13 vite burg për vrasjen e efektivit të RENEA-s, Ibrahim Basha, ngjarje e ndodhur më 24 qershor të vitit 2015.
Burimet e Fax News aludojnë për një lidhje mes efektivit të ndjerë dhe shpërthimit të tritolit sot në banesën e Adem Selimit.
Ende nuk ka një version zyrtar të policisë për ngjarjen e ndodhur pasi po punohet për kapjen e autorëve e megjithatë nuk kanë munguar as zërat për hakmarrje të mundshme, lidhur me ngjarjen e qershorit të 2015-ës.
Klodian Selimi është një ndër personat e grupit të zjarrit që bashkëpunoi me policinë për zbardhjen e ngjarjes ku humbi jetën efektivi i RENEA-s.
(E.L/Faxweb)
Discussion about this post