‘Vladimir Gjuta duhet të shtrohet në spitalin psikiatrik’. Ky ka qenë vendimi që ka dhënë sot Gjykata e Tiranës, në lidhje me Gjutën, i cili ndodhet në burg pas thyerjes së arrestit shtëpiak, pasi u largua nga vendi ku qëndronte.
Ka qenë pikërisht Prokuroria ajo që kërkoi mjekim të detyruar ambulator për Gjutën. “Gjuta duhet të dërgohet në spital psikiatrik për t’u kuruar dhe izoluar. Izolimi të bëhet që të mos përsërisë veprime të rrezikshme”, thuhet në vendimin e gjykatës.
Sakaq, organi i akuzës ka kërkuar mjekim të detyruar për Gjutën, pasi ai rezulton sipas saj të jetë i papërgjegjshëm. Për këtë vendim, Prokuroria është bazuar tek dy akte të ndryshme ekspertimi, të cilët kanë konstatuar se Gjuta është një person jo i përgjegjshëm.
Gjuta më herët është akuzuar për vendosjen e tritolit në farmacinë dhe makinën e babait të Ministrit të Brendshëm, Saimir Tahiri, akuza të cilat nuk u provuan. (E.K/SHUPLAKA)
Discussion about this post