“Historia ime” ka sjellë ditën e sotme historinë e vështirë të një djali 24-vjeçar nga Dibra. Xhetan Koka ka rrëfyer në studio, se prej shumë kohësh ai gjendet në një konflikt me babin dhe vëllain e tij.
Ai pretendon se ata e kanë përzënë nga shtëpia, pas kërkesës së tij për të marrë një hapësirë, ku mund të vendoset dhe të krijojë familjen e tij.
Xhetan thotë se kanë tre shtëpi, një të trashëguar nga prindërit e babait, ku edhe jetojnë dhe dy të tjera, njëra prej të cilave është ende në ndërtim e sipër.
Fëmijëria e tij ka qenë tejet e vështirë sepse familja e tij ka patur probleme ekonomike dhe Xhetan tregon se ka qenë i detyruar nga nëna e tij që të vidhte. Marrëdhënia me babain ka qenë gjithmonë e tensionuar, ai e rrihte, e përzinte edhe nga shtëpia dhe për të mbijetuar, Xhetan edhe ka vjedhur. Si pasojë, që në moshën 13- vjeçare ai është futur në burg.
Mirela Milori: Çfarë arsimi ke Xhetan?
Xhetan: 6 klasë.
Mirela Milori: Nuk e ke mbaruar as 9-vjeçaren?
Xhetan: Jo!
Mirela Milori: Jeton në familje me prindërit dhe?
Xhetan: Me dy prindërit, 4 vëllezër dhe 2 motra.
Mirela Milori: Mesa di një nga motrat nuk jeton?
Xhetan: Po, një motër më ka vdekur.
Mirela Milori: Si ka qenë marrëdhënia me babin?
Xhetan: Shumë keq!
Mirela Milori: Po pse?
Xhetan: Po një prind shumë i dhunshëm, jam rritur nëpër burgje. 13 vjeç kam rënë në burg, tre herë. Për arsye se më nxirrte nga shtëpia s’më jepte bukë, më rrihte. Edhe shkollën e lashë në klasë të 6 sepse s’më jepte lekë për veshmbathje, për mjete shkollore, provime dhe isha i detyruar për të vjedhur.
Mirela Milori: Pra ke rënë në burg për vjedhje?
Xhetan: Po!
Mirela Milori: Të treja herët për vjedhje?
Xhetan: Po!
Mirela Milori: Sa ndjenjët në burg?
Xhetan: Herën e parë më dënuan një vit, ulje moshe 8 muaj. Bëra 6 muaj dola, bëra 3 ditë rashë prapë brenda. Herën e tretë më dënuan 3 vite dhe 4 muaj.
Mirela Milori: Çfarë vodhe që të kapi policia?
Xhetan: Pata grabitur një dyqan. Ai zoti i dyqanit nuk e dinte që e grabita unë, por u dorëzova vetë në polici.
Mirela Milori: Po me vëllezërit, si i ke marrëdhëniet?
Xhetan: Me babain dhe vëllain e madh nuk shkoj mirë, me ata kam probleme.
Mirela Milori: Po me nënën si është marrëdhënia?
Xhetan: Mirë për momentin mirë. Kur isha i vogël e mora rrugën e keqe nga nëna, se më mësonte të vidhja. Por ajo s’kishte faj..
Mirela Milori: Si s’kishte faj?
Xhetan: Ajo prej hallit, ekonomisë, më detyronte të vidhja dru, se s’kishte dru të ndizte sobën.
