Një ngjarje e rëndë ka tronditur qytetin e qetë të Korçës këtë mbrëmje, pasi një i ri ka tentuar të djegë të ëmën me benzinë.
Mësohet se 52-vjeçarja ka pësuar djegie trupore dhe është dërguar me urgjencë në spitalin e Korçës, ku ndodhet nën kujdesin e mjekëve.
“32-vjeçari më datë 13.02.2017, në lagjen nr 8 në Korçë, në banesë dyshohet se pas një konflikti për motive të dobëta me nënën e tij shtetasen M.T, 52 vjeç, i ka hedhur kësaj të fundit lëndë djegëse benzinë në trup dhe më pas i ka vënë flakën”, thuhet në njoftimin e policisë.
Emiljan Tushini, i dënuar më parë për veprat penale si “Vjedhje” dhe “Plagosje e lehtë me dashje”, është arrestuar nga policia.
Detaje:
Specialistët e Sektorit për Krimet e Rënda, në Drejtorinë Vendore të Policisë Korçë, bënë kapjen dhe arrestimin në flagrancë të shtetasit : Emiljan Tushini, 32 vjeç, banues në Korçë (i dënuar më parë për veprat penale: “Vjedhja” dhe “Plagosje e lehtë me dashje”). Arrestimi i tij u bë pasi më datë 13.02.2017, në lagjen nr 8 në Korçë, në banesë dyshohet se ky shtetas pas një konflikti për motive të dobëta me nënën e tij shtetasen M.T, 52 vjeç, i ka hedhur kësaj të fundit lëndë djegëse (benzinë) në trup dhe më pas i ka vënë flakën.
Për pasojë shtetasja M.T, ka pësuar djegie trupore dhe është transportuar për ndihmë mjekësore në Spitalin Rajonal të Korçës, ku ndodhet nën kujdesin e mjekëve.
Emiljan Tushini, është larguar menjëherë nga vendi i ngjarjes, por falë veprimeve të shpejta e të mirëkoordinuara të shërbimeve policore, u bë e mundur kapja dhe arrestimi i tij, si i dyshuar për veprën penale : “Vrasja për shkak të marrëdhënieve familjare, e mbetur në tentativë” parashikuar nga nenet 79/c dhe 22 të Kodit Penal. Materialet proceduriale iu referuan Prokurorisë të Rrethit Gjyqësor Korçë, për hetime të mëtejshme. (D.D/Shuplaka)
