Tronditet Ksamili, vritet në atentat 50-vjeçari me pseudonimin Gelo

Një ngjarje e rëndë ka ndodhur gjatë natës së sotme në Ksamil. Në një atentat është vrarë 50 vjeçari Vangjel Çiko, i njohur edhe me pseudonimin Gelo.

Ende nuk dihen autorët e këtij atentati, po dyshimet e para janë për pistën e hakmarrjes.

Po ashtu mësohet se Çiko është babai i Dhimitër Çikos, i cili ndodhet në burg për vrasjen e Aleksander Bardhit, 47-vjeç, i ekzekutuar me 24 shtator 2016 në fshatin Shendelli.

Bardhi, vëllai i Petrit Bardhit, ish-kryeplak i Shëndellisë dhe ish­administrator i Kaçinarit në Mirditë, dyshohet se u vra nga Albi Xhezairi (i shpallur në kërkim), Dhimitër Çiko dhe Amarildo Lame.

Fill pas kësaj vrasje, një sërë ngjarjesh të tjera rrodhën më pas, siç ishte edhe ngjarja e 12 dhjetorit 2016, ku në Ksamil u vra Agron Xhezairi, 53-vjeç, babai i Albi Xhezairit. Atij më parë i ishte bërë atentat me eksploziv. Edhe vrasja e Xhezairit dhe e sotmja e Çikos dyshohet të jenë seri hakmarrjeje për vrasjen e Aleksandër Bardhit.

(E.K/SHUPLAKA)