Policia e Tropojës ka vënë në pranga një 25-vjeçar nga fshati Koçanaj, i dyshuar si autor i plagosjes me thikë të një 18-vjeçari, gjatë një konflikti për motive të dobëta të ndodhur një ditë më parë në qytetin e Bajram Currit.
Në vijim të hetimeve intensive të kryera nën drejtimin e Prokurorisë së Kukësit, specialistët për Hetimin e Krimeve në Komisariatin e Policisë Tropojë arrestuan shtetasin S. D., 25 vjeç, për veprat penale “Plagosja e rëndë me dashje” dhe “Prodhimi, mbajtja, blerja apo shitja pa leje e armëve të ftohta”.
Sipas hetimeve paraprake, ngjarja ka ndodhur në orët e para të datës 19 korrik 2025, në qendër të qytetit të Bajram Currit, ku pas një debati për motive të dobëta, S. D. dyshohet se goditi me thikë 18-vjeçarin D. H., banues në Bajram Curri. Mjeti prerës i përdorur në ngjarje është sekuestruar nga Policia si provë materiale.
I plagosuri është në kujdesin e mjekëve dhe ndodhet jashtë rrezikut për jetën.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Kukës, për veprime të mëtejshme ligjore.