Trump gjen momentin më ‘kritik’ për të shigjetuar kancelaren Merkel. Tregon “gabimet e mëdha” që po bëhen

Presidenti i SHBA Donald Trump thotë se njerëzit në Gjermani janë kthyer kundër liderit për shkak të ‘gabimeve të mëdha’ që janë bërë me emigrantët.

Presidenti i Shteteve të Bashkuara të Amerikës, Donald Trump, ka paralajmëruar se vendi që ai udhëheq duhet të shmangë problemet e emigrimit me të cilat është përballur Europa.

Trump sulmoi Gjermaninë, një nga aleatët më të ngushtë të SHBA-së, duke thënë se emigrimi në Bashkimin Europian është bërë burim dhune.

“Njerëzit në Gjermani po kthehen kundër liderit të tyre pasi emigrimi i jashtëligjshëm ka tronditur koalicionin e Berlinit,” shkruajti ai sot në rrjetet sociale.

“Krimi në Gjermani po rritet dita ditës,” shtoi Trump. “Gabime të mëdha po bëhen në Europë me lejimin e miliona njerëzve që hyjnë e që po e ndryshojnë kulturën e tyre për keq”.

Kjo deklaratë e Trump vjen në një kohë kur Merkel po lufton për të shpëtuar qeverinë e saj pas kërkesave të Ministrit të saj të Brendshëm për të kthyer emigrantët në kufi.

Kancelarja është në vështirësi të madhe pasi ka marrë një ultimatum 2-javor nga partnerët e koalicionit për të siguruar marrëveshjen për emigrantët me vendet fqinje të Europës. (B.H/Faxweb)