Presidenti amerikan, Donald Trump reagoi me tone të ashpra pas sulmeve masive nga ushtria ruse, me dronë dhe raketa, në Ukrainë. Trump thotë se nuk është i kënaqur me Vladimir Putinin, pas sulmit më të madh ajror të Moskës ndaj Ukrainës gjatë fundjavës.
Në një postim në platformën Truth Social, Trump shkruan: “Gjithmonë kam pasur një marrëdhënie shumë të mirë me Vladimir Putinin e Rusisë, por diçka i ka ndodhur atij. Ai është çmendur plotësisht! Po vret shumë njerëz pa nevojë, dhe nuk po flas vetëm për ushtarë”.
“Gjithmonë kam thënë se ai dëshiron të gjithë Ukrainën, jo vetëm një pjesë të saj, dhe ndoshta kjo po rezulton të jetë e saktë, por nëse e bën, kjo do të çojë në rrëzmin e Rusisë!”, shprehet Trump.
Në komente të ndara për gazetarët të dielën në mbrëmje, Trump nuk fshehu zemërimin me Putin kur tha se: “ai po dërgon raketa në qytete dhe po vret njerëz, dhe kjo nuk më pëlqen aspak”.
I pyetur nëse po shqyrtonte më shumë sanksione ndaj Rusisë, Trump tha: “Absolutisht”.
