Trump shkroi në Truth Social të martën se Kanadaja “dëshiron shumë të jetë pjesë e Sistemit tonë të mrekullueshëm të Kupolës së Artë”, i cili do të kushtonte rreth 175 miliardë dollarë dhe do të ndërtohej gjatë tre viteve të ardhshme.
Presidenti Trump shpjegonte se zyrtarët kanadezë po shqyrtonin propozimin e tij që Kanadaja të kontribuonte me 61 miliardë dollarë për mburojën e tij të mbrojtjes nga raketat “Kupola e Artë”, ose të mos paguante asgjë nëse do të bëhej shteti i 51-të i SHBA-së.
Trump, i cili ka kërcënuar vazhdimisht sovranitetin kanadez, i bëri komentet menjëherë pasi kryeministri kanadez Mark Carney përshkroi planet për lidhje më të ngushta mbrojtëse me Bashkimin Evropian dhe mbasi mbreti Charles III i kishte dhënë disa goditje të holla SHBA-së dhe administratës Trump gjatë fjalimit të tij në Parlamentin Kanadez më herët të martën, duke thënë se një “Kanada e sigurt” mund të “japë shumë më tepër sesa çdo fuqi e huaj mund të na marrë ndonjëherë”.
Trump ka shprehur interes për aneksimin e Kanadasë për muaj të tërë, duke kërcënuar vazhdimisht sovranitetin e fqinjit verior dhe e ka angazhuar kombin aleat në një luftë tarifore.
Kryeministri kanadez Carney ia bëri të qartë Trump gjatë takimit të tyre në Shtëpinë e Bardhë në fillim të këtij muaji se Kanadaja nuk ka interes të bëhet shteti i 51-të i SHBA-së. Carney tha në X ndërsa ndau një video të fjalimit të mbretit britanik të Kanadasë të martën, “Veriu i Vërtetë është i fortë dhe i lirë.”
Carney u tha gazetarëve javën e kaluar se zyrtarët kanadezë po “shqyrtonin” mundësinë e investimit në mburojën mbrojtëse të propozuar nga Trump. Zyra e kryeministrit kanadez nuk iu përgjigj menjëherë kërkesës së Axios për koment në lidhje me postimin e Trump.
