Presidenti i Shteteve të Bashkuara, Donald Trump ka larguar nga Këshilli i Sigurisë strategun e tij politik Steve Bannon. Kjo duket se është një hap pas i Presidentit pas kritikave që morri pas emërimit të Bannon në këtë post. Kritikët thonin se nuk është e drejtë që një person politik të jetë pjesë e mbledhjeve në të cilat diskutohet siguria kombëtare.
Përbërja e re e Këshillit për Siguri Kombëtare u njoftua sot në Regjistrin Federal por emrat do të bëhen publik nesër.
Burime nga Shtëpia e Bardhë, duke folur në kushte anonimiteti, kanë thënë se memorandumi largon Bannon dhe e rikthen drejtorin e inteligjencës kombëtare dhe kreun e shefave të përbashkët të stafit, si anëtarë të përhershëm të panelit.
Një zyrtar i lartë i Shtëpisë së Bardhë, i ka thënë agjencisë Associated Press se Bannon më nuk ishte i nevojshëm të ishte anëtarë i përhershëm të këshillit, pas dorëheqjes në muajin shkurt, të këshilltarit të Trumpit, për siguri kombëtare, Michael Flynn.
Agjencia Reuters, ka cituar një zyrtar të Shtëpisë së Bardhë të ketë thënë se largimi i Bannon ishte fitore për këshilltarin aktual të sigurisë kombëtare H.R. McMaster, i cili thuhet se ka pasur marrëdhënie të tensionuara me Bannon. (E.K/SHUPLAKA)
Discussion about this post