Lidhur me një foto të publikuar nga Presidenti i SHBA-së, Donald Trump, ku nëpërmjet ndihmës së inteligjencës artificiale ai është veshur si një Papë, eksperti i teorive të sigurisë, Xhavit Shala ka një qasje ndryshe nga një pjesë e madhe e komentuesve.
Fotoja e publikuar në rrjetet sociale ka ngjallur reagime të shumta të cilat e kanë parë si një fotografi provokative, që nuk tregon respekt për ndarjen nga jeta të Papa Françeskut. Kjo foto vjen pak ditë pasi Presidenti Trump deklaroi se: “Do doja të isha një Papë, pse jo”, ka thënë ai.
Në këndvështrimin e ekspertit, fotoja është një simbol paqeje, për të cilën Trump ka bindjen se do e vazhdojë pas largimit nga jeta të Papa Françeskut.
“E shof pak ndryshe. Dihet që Papa ka qenë një simbol i paqes. Ai është përpjekur të ndërmjetësojë edhe për rastin e paqes në Ukrainë. Mbase këtë ka dashur të nënkuptojë Presidenti Trump, që do ta vazhdojë pavarësisht se po tërhiqet nga ky ndërmjetësim zyrtar, por me idenë që do të jetë njeri i paqes, kështu e konceptoj.
Ai ka paraqitur veten të veshur si Papë, por pse do e donte ai diçka të tillë kur Trump ka një pozicion. Ai e ka shprehur se sundon botën, pra është më mirë të mbaj këtë pozicion apo atë të Papës, një lider shpirtëror. Në pozicionin që është ai, e ndjen veten më komod, ndaj nuk mendoj se ka të bëjë me pozicionin e Papës por ka të bëjë në raport me paqen”, theksoi eksperti Shala.
