Trupi i Andrea Stefani mendohet të mbërrijë të martën në Tiranë. Për të gjithë ata që do duan të shprehin ngushëllimet e rastit, trupi do vendoset për pak kohë për homazhe në ambjentet e TVSH përpara se të përcillet në banesën e fundit.
Analisti i njohur Andrea Stefani u nda nga jeta para dy ditësh, teksa vuante prej disa muajsh nga një sëmundje e rëndë. Ai ishte prekur nga një tumor në stomak. Për fat të keq, kimioterapia nuk dha efektet e pritshme.
Ndërhyrja kirurgjikale rezultoi fatale. Njeriu i medias është shuar të shtunën pasdite në një spital në Romë. Ai nuk dëshironte që sëmundja e tij të bëhej publike dhe vazhdimisht qetësonte ata pak miq që e dinin duke u thënë që ishte diçka e lehtë që po kalonte dhe se kurimi po ecte mirë. Andrea pas pak ditësh festonte 58 vjetorin. Ai ka lindur në 8 dhjetor të vitit 1958. Andrea la pas bashkëshorten e tij Enkeleden dhe dy fëmijë, Danielin 15 vjeç dhe Stefaninë 12 vjeçe.
