Ndërkohë që shteti fqinj, Greqia është në fushatë elektorale për zgjedhjet e parakohshme të shpallura vetëm disa ditë më parë, një nga njerëzit që mbështeste zgjerimin e BE-së, ishte edhe kryeministri Alexis Tsipras.
Por ndryshe nga herët e tjera, Tsipras ka folur për kushte ndaj Shqipërisë gjatë kohës që po prezantonte programin e tij elektoral, ndërsa u ndal gjerësisht edhe tek politika e jashtme e në mënyrë të veçante tek marrëdhëniet e Greqisë me Maqedoninë e Veriut, Turqinë dhe Shqipërinë.
Sa i përket Shqipërisë, kryeministri grek tha para mbështetësve të partisë së tij se një nga pikat e forta të programit të tij elektoral dhe objektiv për mandatin e ardhshëm të qeverisë në rast fitoreje do të jetë edhe vendosja e një kushti ndaj Shqipërisë për pranimin në BE.
Tsipras deklaroi se të drejtat e minoritetit grek në Shqipëri do të jenë kriter që Greqia të jap mbështetjen e saj për pranimin e vendit tonë në Bashkimin Evropian.
“Të drejtat e minoritetit grek në Shqipëri vendosen për herë të parë si kriter për hyrjen e Shqipërisë në Bashkimin Evropian”, theksoi Alexis Tsipras.
