Tashmë që sezoni veror është në prag, prefektja e Qarkut të Shkodrës ka mbledhur Taskforcën për t’i paraprirë përgatitjeve dhe për të krijuar kushte sa më të mira për turistët vendas dhe të huaj. Qarku i Shkodrës ofron turizëm të larmishëm — që nga ai detar me Velipojën, tek ai malor me Thethin, e deri tek turizmi aventurier me lumin e Shalës, etj.
Për këtë arsye, prefektja u ka kërkuar përfaqësuesve të bashkive që të marrin masa për të mos përsëritur problematikat e viteve të kaluara. Ndërkohë, përfaqësuesit e disa prej bashkive kanë ngritur në takim problematika që lidhen kryesisht me mungesën e financimeve, gjë që e bën të vështirë marrjen e masave për sezonin veror.
Rritja e numrit të turistëve, përveç marrjes së masave nga institucionet e pushtetit vendor, kërkon edhe financime konkrete, në mënyrë që turizmi të jetë i qëndrueshëm dhe jo fragmentar.
