Në ambientet e burgut 302 ka vrarë veten një 23-vjeçar, Napolon Luca. 23-vjeçari, i lindur në Dibër dhe banues në Tiranë, është vetëvarur me çarçaf dhe ndodhej në burg për akuzat: plagosje të lehtë dhe kanosje. Një grup hetimor është dërguar në vendin e ngjarjes dhe po punon për sqarimin e rrethanave. Mësohet se frymën e fundit ai e la në QSUT, pasi u gjet nga gardianët dhe u dërgua me urgjencë në spital.
Detaje:
Napolon Luca, u arrestua më 15 janar të këtij viti bashkë me tre vëllezërit e tij, Hajri Luca, 25 vjeç; Dritan Luca, 27 vjeç; Alush Luca, 33 vjeç; pasi kishin kanosur seriozisht për jetën dhe kishin goditur me grushte dhe shkelma një 27-vjeçar nga Tirana.
Fillimisht në pranga u vu më i vogli i vëllezërve, Napoloni, pas kallëzimit të shtetasit L. M, 46 vjeç, të cilit ai i ka vjedhur banesën në vendin e quajtur rruga “Princ Vidi”, në Tiranë. Pas kësaj, tre vëllezërit e 23-vjeçarit kanë dhunuar nipin e kallëzuesit, shtetasin me inicialet D.Sh.
Por gjatë marrjes në pyetje 23-vjeçari Napolon Luca, i dënuar edhe më parë për veprat penale të “Shkatërrimit të pronës” dhe “Kanosjes”, pranuar se ishte autor i disa vjedhjeve të tjera të ndodhura më konkretisht:
-Më datë 01.01.2017 vjedhje banese ku ka marrë 7.000 lekë dhe orë dore me vlerë 100 euro.
-Më datë 06.01.2017 vjedhje banese ku ka marrë 16.000 lekë.
-Më datë 07.01.2017 vjedhje në një magazinë ku ka marrë një sasi kabulli elektrik.
Lidhur me këto akuza, Napolon Luca u dënua, dhe u transferua në burgun 302, ku edhe i dha fund jetës ditën e sotme. Sakaq, kanë nisur hetimet për të hedhur më shumë dritë mbi ngjarjen, dhe arsyet që çuan të riun drejt këtij akti të rëndë. (J.V/Shuplaka)
Discussion about this post