Pak kohë më parë, mediat dhe autoritetet italiane e akuzuan se donte te konvertonte Papën, por kush është në të vërtetë Brendon Bardhi, 22-vjeçari me origjinë shqiptare që është larguar nga Shqipëria që në fëmijëri?
Brendon është mysliman dhe pas incidentit me Papën është rikthyer tek gjyshërit në moshën 22-vjeçare sipas një vendimi të ministrit të Brendshëm italian, që urdhëroi deportimin e tij javën e shkuar nën dyshimin për ekstremizëm.
Mirëpo Brendon nuk duket aspak i rrezikshëm. Në një prononcim për Top Channel, ai e konsideron veten një besimtar që u pa i dyshimtë nga autoritetet, por ai shprehet se Papës i është drejtuar vetëm për ndihmë.
“Dola në mëngjes nga ora 5, me pak frikë dhe emocion. Ndalova në një kishë, kërkova priftin e saj që të më bënte lidhje me Papën. Në momentin që ky person më pa me Kur’anin mbeti shumë i trembur. Unë i buzëqeshja, ai më shihte me inat. U ndjeva shumë fajtor, edhe pse nuk isha. Mesazhi që doja t’i përcillja Papës ishte që jo të gjithë jemi njësoj, jo të gjithë jemi terroristë”, tregon Bardhi. Mirëpo pas kësaj Brendon është mbajtur në burg.
“Në ditën e parë që kam shkelur aty më konsideruan terrorist, që nuk isha. Çdo gjë që thosha nuk merrej për bazë. Unë isha në shtëpinë time, sepse jam italian. Jam një djalë normal, që ka ndihmuar shumë persona. Mundohem t’i ndihmoj e jo t’i vras”, vazhdon më tej tregimin ai.
Brandon Bardhi nuk është personi i vetëm që është dëbuar nga autoritetet italiane për të njëjtin motiv. Ai është i pesti i dëbuar vetëm për pak kohë.
“Kërkoj ndihmë, sepse edhe unë jam njeri i dobët. Më duhet një bazament, të kem një punë që të vazhdoj jetën time”, thotë Bardhi.
I riu tanimë ka frikë nga paragjykimet dhe kërkon një shans të ketë një jetë normale. Mirëpo tani i duhet të përballet me përbuzjen e shoqërisë që nuk është aq mirë e informuar se çfarë ka ndodhur në të vërtetë me të. (D.D/Shuplaka)
https://www.youtube.com/watch?v=EdfbRv1cR94
