Vdekja e nënës së re Drilona Durici duke u djegur brenda në ashensor ishte një ngjarje mjaft tronditëse. Kjo edhe për faktin se krijoi panik në rradhët e njerëzve për sigurinë në ashensore, po edhe për shkak se në barkun e saj ajo mbante dhe një tjetër jetë.
Ndërkohë që nga Prokuroria e Tiranës mësohet se dosja e saj është mbyllur pa asnjë të akuzuar. Prokuroria thotë se pasi u administruan aktet e ekspertimit të Drejtorisë së Mbrojtjes nga Zjarri dhe Shpëtimit, dhe të Inspektoriatit të Shërbimit Teknik Industrial, u konkludua se bëhej fjalë për ngjarje aksidentale dhe se askush, qoftë individ apo shoqëri, nuk mund të bëhej përgjegjës për vdekjen e gruas.
Ekspertët i thanë Prokurorisë se ashensori ishte jashtë çdo kushti teknik, dhe se pallati nuk kishte administrator, që të kujdesej për shërbimet.
Gjithashtu, u vërtetua se zjarri nuk u shkaktua nga ndonjë faktor i jashtëm, por si pasojë e djegies së droselit të ashensorit e që më pas flakët u përhapën gjithandej.
Duke u ndodhur përballë fakteve të tilla, katër muaj pas ditës kur nëna e një fëmije humbi jetën, prokurorët vendosën të mos regjistrojnë procedim penal, pasi nuk kishin asnjë të dyshuar, mbi të cilin mund të shtrinin hetimet. (E.K/SHUPLAKA)
