Ish-kryetari i bashkisë së Leskovikut Fatmir Guda, zbulon detaje të tjera nga kërcënimi I sotshëm me pistoletë në kokë.
“Nëse mund t’i shpëtosh prokurorisë, s’mund t’i shpëtoni plumbit. Ndaj, mos e hap shumë gojën”, mësohet të kenë qenë fjalët me të cilat kërcënuesi iu drejtua Gudës.
Në një intervistë për një të përditshme shqiptare, Guda pohon se kanë qenë dy persona të armatosur dhe maskuar që i kanë zënë ‘pritë’ 30 metër afër shtëpisë, duke e kërcënuar me jetë.
“Ditën e sotme dy persona rreth orës 17:10 dy persona të maskuar dhe armatosur më janë afruar. Isha 30 metra larg shtëpisë, por rruga ishte e pandriçuar, ishte errësirë. Njëri prej tyre mu afrua dhe më foli, ndërsa tjetri ishte pasiv. Ruante territorin.”, shprehet Guda.
Kjo nuk është hera e parë për Gudën që merr shantazhe dhe kërcënime, kështu që ai tregon se ndjen frikë jo vetëm për vete por edhe për fatin e familjarëve të tij.
“Ky nuk është kërcënimi i parë. Më datën 20 nëntor, ditën kur u mbajtën zgjedhjet për kryetar Bashkie në Kolonjë u kërcënova nga persona të armatosur e maskuar. Gjithçka bëhet që unë të mbyll gojën, pas hetimeve të prokurorisë. Unë jam nënkryetari i PD-së së Kolonjës dhe anëtar i këshillit bashkiak.”, shton më tej ai.
Në fund, ish-kryetari i bashkisë së Leskovikut tregon se nuk ka besim tek strukturat e policisë, pasi ato sipas tij s’i kanë ofruar asnjë mbështetje deri më tani. (D.D/Shuplaka)
Discussion about this post