Pas komandimit të tij në krye të Policisë së Shtetit Rebani Jaupi ka folur për ‘’Fax News”.
Ai thotë e komandimi tij është bërë gjatë ditës së sotme, ndërsa ka pasur dhe një takim me paraardhësin e tij Haki Çako.
‘’Na presin sfida të mëdha, komandimi im në krye të Policisë së Shtetit u bë zyrtarisht sot. Para Policisë ka sfida të mëdha, duke nisur nga lufta kundër grupeve kriminale”, u shpreh Jaupi për ‘’Fax News”.
Edhe pse lajmi përflitej prej kohësh sot erdhi dhe vendimi final për shkarkimin e Haki Çakos.
Në arsyetimin e përdorur dhe nga Ministri Fatmir Xhafaj thuhet se sfidat që e presin Policinë e Shtetit, kërkojnë një ritëm më të shpejtë dhe dinamikë të madhe pune.
Për këtë arsye është i domosdoshëm një lidership i ri, me energjitë të reja për të motivuar dhe çuar përpara punën e Policisë së Shtetit.
DETAJET E MINISTRISË SË BRENDSHME:
Me propozim të Ministrit të Brendshëm, zotit Fatmir Xhafaj, Këshilli i Ministrave miratoi lirimin nga detyra të Drejtorit të Përgjithshëm të Policisë së Shtetit, Drejtues Madhor Haki Çako.
Ministri Xhafaj, vlerëson kontributin, angazhimin dhe përkushtimin e zotit Çako në drejtimin e Policisë së Shtetit, gjatë viteve të fundit. Ai ka një karrierë të gjatë në Polici dhe ka drejtuar me profesionalizëm struktura të niveleve të ndryshme.
Ministri Xhafaj, pati një takim gjatë të cilit e falënderoi Drejtues Madhor Çakon për punën dhe bashkëpunimin e deritanishëm, në përmbushjen e misionit të Policisë së Shtetit.
Megjithatë, realizimi i objektivave të këtij mandati qeverisës, në fushën e rendit dhe sigurisë publike, sfidat që e presin Policinë e Shtetit, kërkojnë një ritëm më të shpejtë dhe dinamikë të madhe pune. Për këtë arsye është i domosdoshëm një lidership i ri, me energjitë të reja për të motivuar dhe çuar përpara punën e Policisë së Shtetit.
Puna e kësaj të fundit, domosdoshmërisht duhet të jetë e orientuar drejt rezultateve konkrete, me qëllim që t’u përgjigjet, kësisoj, më mirë kërkesave të kësaj faze të re dhe pritshmërive të larta të publikut dhe partnerëve ndërkombëtarë ndaj Policisë së Shtetit.
