Pas publikimit të emrave të ministrave dhe zv/ministrave teknikë në përputhje me marrëveshjen mes kryeministrit Edi Rama dhe kryetarit të Partisë Demokratike, Lulzim Basha, ka dalë emri i drejtorit të parë të ri që është emëruar sipas paktit të arritur.
Arjan Hoxha është emëruar drejtor i ri i Burgjeve, referuar burimeve për gazetën “Panorama”. Ai vendoset në këtë post duke zëvendësuar kështu ish-drejtorin Miklovan Kopani. Hoxha ka mbajtur më parë detyrën e ish-shefit të Krimit Financiar.
Në 2014-ën emri i tij u përfol pas arrestimit të babait të ish-ministrit të Punëve të Brendshme Saimir Tahiri. “Kam qenë shefi i Antikrimit Financiar. Në një nga aksionet u ndalua Bashkim Tahiri. Saimir Tahiri më tha lutu që të mos marr pushtetin. Efektivët që morën pjesë në atë aksion, u liruan. Disa efektivë të tjerë u lëvizën nga detyra. Disa nga kolegët i janë drejtuar Gjykatës.”, shprehej ndër të tjera Hoxha në atë kohë.
Në sajë të marrëveshjes të arritur mes forcave politike në vend, 5 drejtori u bënë pjesë e teknicienëve. Konkretisht disa nga emrat që u shkarkuan janë:
Drejtori i OSHEE, Ardian Çela
Drejtori i Përgjithshëm i Aluiznit, Artan Lame
Drejtori i Përgjithshëm i Hipotekave, Ilirjan Muho
Drejtori i pergjithshem i Burgjeve, Miklovan Kopani
Drejtori i pergjithshem i Agjensisë së Zhvillimit Bujqësor e Rural
(XH.A/SHUPLAKA)
