Një ditë më parë qarkulloi në media lajmi i ndalimit të një shtetasi izraelit në aeroportin e Rinasit, i identifikuar si Yoram Frig, i cili u kap me një pajisje elektronike të dyshimtë, të cilësuar si pajisje përgjimi.
Paraditen e sotme u bë me dije se izraeliti u lirua megjithatë ai nuk mund të largohet nga Shqipëria për shkak të bllokimit të pasaportës në kuadër të hetimeve që po kryhen nga Prokuroria.
Në një intervistë të dhënë ditën e sotme, ai ka rrëfyer se nuk ka kryer asnjë gjë të paligjshme me pajisjen teksa tregon arsyen pse udhëton shpeshherë drejt Shqipërisë.
Izraeliti Frig shprehet se është një hetues privat i pajtuar nga një biznesmen në Shqipëri, i cili ka ardhur dhe herë të tjera në Tiranë: “Unë jam hetues privat dhe ajo që më është bllokuar, nuk është pajisje përgjimi, pra nuk kryen përgjime. Unë kam ardhur për të ushtruar kontrolle në një kompani private nëse ka ose jo përgjues.”, ka shpjeguar ai për “Gazetën Shqiptare”.
I pyetur konkretisht lidhur me pajisjen apo nëse ajo çka bën ai është aktivitet i paligjshëm, izraeliti shprehet se pajisje nuk shërben për përgjime, por për të zbuluar përgjuesit. Ai shprehet se kjo pajisje është e ligjshme në Izrael dhe kudo në botë.
“Pajisja është e ligjshme në Izrael dhe kudo në botë. Unë jam hetues privat dhe nuk e kam ushtruar aktivitetin vetëm në Shqipëri, kam punuar në disa vende të botës. S’dua të hap probleme me askënd. Kjo është puna ime, këtë bëj unë.”
Sa për ndalimin e djeshëm në Rinas, Yoram Frig shprehet se ndalimet e befta e bënë të humbasë fluturimet për të cilat kishte prerë edhe biletat e udhëtimeve.
(XH.A/SHUPLAKA)
