Kolegji Zgjedhor ka marrë vendimin për Bindjen Demokratike, pasi ishte ankimuar regjistrimi i saj në KQZ. Kolegji e ka cilësuar të ligjshëm dhe brenda afateve regjistrimin e Partisë së drejtuar nga Astrit Patozi, duke i hapur rrugë kandidatëve të saj në zgjedhjet lokale që janë parashikuar të mbahen në 30 Qershor.
Kujtojmë se në vendimin e dhënë në KQZ për regjistrimin e Bindjes Demokatike i vetmi që votoi kundër ishte kreu i Komisionit Klement Zguri. (Lexo edhe këtu)
Ishte Partia Bashkimi Demokrat Shqiptar, me kryetar Ylber Valterin ajo që depozitoi në Kolegjin Zgjedhor ankimin në të cilin kërkoi çregjistrimin e Partisë “Bindja Demokratike”.
Në argumentet ligjore, Partia Bashkimi Demokrat Shqiptar theksonte se vendimi i gjykatës i paraqitur në KQZ nga ‘Bindja Demokratike’ nuk kishte marrë formë të prerë.
“Vërtetimi i gjykatës, i paraqitur në KQZ nga Bindja Demokratike nuk ka marrë formë të prerë. Duke futur në garë, në kundërshtim me ligjin për partitë dhe Kodin Zgjedhor, organizata politike të paregjistruara në Gjykatë, KQZ cenon kushtet e barabarta në zgjedhje dhe ligjshmërinë e zgjedhjeve.
Kodi Zgjedhor thotë qartë se “për të marrë pjesë në zgjedhje një parti duhet të paraqesë vërtetimin e regjistrimit në gjykatë”, gjë që Bindja Demokratike nuk e ka, sepse vërtetimi i paraqitur nuk është i formës së prerë. Deri në 23 prill 2019, kur ishte afati i fundit për të dorëzuar kërkesat në KQZ, Bindja Demokratike nuk ekzistonte si parti, prandaj pranimi I saj në zgjedhje nga KQZ është i paligjshëm”, theksohej në argumentet e PBDSH.
(E.K/Faxweb.al)
Discussion about this post