Është konfirmuar në detyrë prokurori Besnik Cani, ky ka qenë vendimi i dhënë sot nga ana e Komisionit të Pavarur të Kualifikimit. Cani është njëherësh kandidat për Këshillin e Lartë të Prokurorisë.
Çfarë ndodhi në seancën e mëhershme:
Problemet kryesore të Canit sipas relacionit që u lexua 4 ditë më parë, rezultuante nga një kontratë e diskutueshme sipas KPK-së me kompaninë “Kastrati” për një pikë karburanti në pronë të tij, një kërkesë për kredi të butë si i pastrehë nga Bashkia Fier në një kohë kur prokuroria kishte në hetim ish-kryebashkiakun si dhe pushimi apo mosfillimi i hetimeve për disa dosje. KPK po ashtu theksoi edhe disa probleme me deklarimin e pasurisë.
Cani u mbrojt duke vlerësuar hetimin e KPK-së si shterues, por kundërshtoi dyshimet e ngritura për shkelje të etikës, konfliktin e interesit dhe aprofesionalizmin në trajtimin e disa çështjeve. Cani tha se kontrata me kompaninë nuk ishte investim, por “kontratë qiraje me pagesë variable”, ndërsa tha se kishte gjetur që kjo lloj kontrate përdorej në “Australi, Singapor e Kamboxhia”.
Ai tha se KPK kishte vërtetuar që nuk kishte ndikuar në hetimin ndaj ish-kryebashkiakut të Fierit, Baftjar Zeqo dhe se megjithëse bashkëshortja kishte bërë kërkesën, ata ishin “tërhequr nga përfitimi i kredisë së butë”.
(E.K/FAXWEB.AL)
