Edhe pse kanali vaditës i Klosit u rivendos një vit më parë në funksion pas rreth 20 vitesh, në fshatin Mallunxë të njësisë administrative Lis rrezikon që këtë vit të mos jetë në funksion.
Janë vetë banorët e Mallunxës që e paralajmërojnë këtë.
Zenel e Fadil Panavia thonë se veç dëmtimeve që ka pësuar pranë banesave të tyre, në përroin e quajtur Lusë rrezikon të shembet tubi i kanalit prej 50 metrash. Sipas banorëve, nëse nuk ndërhyhet në kohë për riparimin e njërës këmbe e cila është e dëmtuar, atëherë kanali këtë vit nuk do të jetë funksional për shkak se tubacioni mund të përfundojë në përrua.
Banorët janë falenderues për vitin e kaluar, pasi sipas tyre pas rreth 20 vitesh kanë arritur të vaditin me këtë kanal.
Banorët kërkojnë nga bordi i kullimit që të ndërhyhet shpejt, pasi nëse tubi tek përroi i Lusës mbushet me ujë, ai mund të shembet nga momenti në moment. (M.D/ Shuplaka)
