Në kuadër të aksionit kundër informalitetit, pak ditë më parë nga Drejtoria e Tatimeve u lëshua në media në mënyrë jozyrtare një listë me biznese që ishin mbyllur përkohësisht në Tiranë.
Shkak për këtë mbyllje sipas Tatimeve ishin shkeljet e gjetura, përfshirë moslëshimin e kuponave tatimorë, apo mospagim taksash.
Në listën e shpërndarë figuronte dhe “Donianna”sh.p.k, informacion që hidhet poshtë nga administratorja e kompanisë Donika Mici.
Në një reagim për redaksinë e Faxweb.al Mici shprehet se kjo kompani nuk ka asnjë detyrim ndaj shtetit, dhe aktiviteti në këtë biznes vijon si normalisht.
“Në lidhje me këtë publikim kemi kontaktuar me Drejtorin e Borxhit në Drejtorinë e Tatim Paguesve të Mëdhenj dhe na ka informuar se nuk kemi dijeni dhe nuk kemi dhënë asnjë informacion zyrtar në lidhje me atë çfarë është publikuar në media.
Duhet të sjell në vemendjen Tuaj si media se shoqëria”Donianna” shpk nuk është debitore ndaj Drejtorisë së Tatim Paguesve të Mëdhenj ku ne jemi në juridiksion.
Nuk kemi asnjë akt bllokim aktiviteti dhe bllokim llogarish rrjedhëse të shoqërisë në bankat e nivelit të dytë të ndërmarrë nga Drejtoria e Tatim Paguesve të Mëdhenj”, thuhet mes të tjerave në reagimin e Donika Micit.
(E.K/Faxweb.al)
Discussion about this post