Arben Kraja do të jetë kryetari i Prokurorisë së Posaçme Antikorrupsion. Kraja më herët ka qenë prokuror në Prokurorinë e Përgjithshme, ndërsa ka një karrierë më shumë se 15-vjeçare. Ai e ka nisur karrierën e tij në organin e akuzës që në vitin 1993 dhe në dy dekadat e fundit ka punuar në Prokurorinë e Përgjithshme, ku ka drejtuar sektorë të rëndësishëm si task forca kundër krimit dhe korrupsionit. Ai është është 47 vjeç, me origjinë nga Shkodra dhe flet 3 gjuhë të huaja.
Në muajin dhjetor të vitit të kaluar prokurori u përball me Komisionin e Pavarur të Kualifikimit dhe kaloi me sukses procesin e vetingut sepse nuk ju gjetën probleme me pasurinë, integritetin e figurës dhe me aftësitë profesionale. Kraja mori vëmendjen e mediave pak kohë më parë sepse ka patur në dorë një prej dosjeve më të bujshme.
Ai ka hetuar kryetarin e Partisë Demokratike, Lulzim Basha për aferën e Rrugës së Kombit. Basha, asokohe ministër i Jashtëm, së bashku me ish-zyrtarë të rrugëve, u vendos nën përgjegjësi për rrugën Durrës-Kukës. Basha iu shpëtoi akuzave falë Gjykatës së Lartë.
Ditën e djeshme para Këshillit të Lartë të Prokurorisë Kraja shpalosi platformën e tij si drejtues i SPAK. Gjatë fjalës së tij, Kraja u shpreh se ka bashkëpunuar me ndërkombëtarët për disa ligje, ndërsa pati kritika për luftën kundër korrupsionit në nivele të larta. Sipas tij, duhet bërë më shumë në këtë drejtim duke garantuar një zbatim korrekt të ligjit në praktikë.
“Do të paraqes në mënyrë të përmbledhur vizionin tim për drejtimin e SPAK. Jam i ndërgjegjshëm për punën që na pret për ngritjen dhe efektivitetin e kësaj strukture.Vlerësoj KLP për mënyrën profesionale dhe transparente në përzgjedhjen e prokurorëve për SPAK dhe sot për garën për drejtuesin e saj. Kam eksperiencë drejtimi, e cila garanton suksesin tim në drejtim të institucionit. Drejtuesi do të ketë eksperienca manaxheriale, njohuri administrative, financiare.
Kam bashkëpunuar me organizatat ndërkombëtare për draftimin për sekuestro parandaluese. Kërkoj besimin e KLP për të drejtuar këtë institucion të ri ku të vë në praktikë aftësitë e mia drejtuese. Kam punuar me asistencën ndërkombëtare për draftet e para për funksionimin e SPAK dhe ngritjen e BKH. Publiku të informojë në kohë për fillimin e hetimeve dhe për rezultatet e hetimeve.
Kemi dështuar në ndëshkimin e korrupsionit në nivel të lartë ose krimit të organizuar. Situata është shqetësuese. Nga pamja ligjiore jemi të mbrojtur, duhet zbatimi korrekt i ligjit në praktikë. Pavarësia e prokurorëve do të garantojë suksesin e këtij institucioni”, tha kandidati Arben Kraja.
I pyetur nga anëtari i KLP, Vatë Staka sesi planifikon të plotësojë organikën e Prokurorisë së Posaçme Antikorrupsion, Kraja deklaroi se ka dy mënyra për ta bërë këtë gjë.
“Nga 15 prokurorë që ka caktuar KLP për nisjen e SPAK, kemi vetëm 8. Kemi 2 mundësi ligjore për plotësim: drejtuesi mund të caktojë një prokuror të përkohshëm që plotëson kriteret për të ushtruar veprimtari në SPAK. E dyta, drejtuesi i SPAK mund t’i kërkojë Prokurorisë së Përgjithshme prokurorë për një detyrë specifike në SPAK”, tha Arben Kraja.
Tashmë Kraja do të drejtojë luftën antikorrupsion në nivelet e larta dhe goditjet ndaj pushtetarëve, të cilat priten nga SPAK.
(M. I./ Faxweb.al)
Discussion about this post