Ish-deputeti i Partisë Demokratike, Xhemal Gjunkshi e sheh si një fitore të opozitës vendimin për t’u ulur në tryezën e reformës zgjedhore bashkë me mazhorancën.
Nga studio e emisionit “Aktualitet” të gazetarit Bejdo Male, Gjunkshi deklaroi se kjo marrëveshje u arrit falë presionit ndërkombëtar.
“Kjo është një ngjarje e vonuar, ka fituar opoizita shqiptare, ka fituar PD. Të gjithë jemi dëshmitarë që përpara disa muajsh vetëm në sajë të punës këmbëngulëse u arrit që Bundestagu gjerman t’i adresohet Shqipërisë me 9 kërkesa.
Vetëm në sajë të presionit të madh ndërkombëtar, u realizua dhe u bë e mundure që të gjitha palët që bien dakord dhe të ulen për zgjidhjen e kësaj krize. Ky hap është hapi i parë për të shkuar drejt zgjedhjeve të parakohshme, të lira dhe të ndershme”, tha Xhemal Gjunkshi.
Por gazetari Arben Rrozhani nuk ishte dakord me Gjunkshin. Sipas tij, opozita nuk ka moral, përsa kohë pranoi që të ulej në të njëjtën tryezë me Damian Gjiknurin.
Pjesë nga diskutimet gjatë emisionit:
Xhemal Gjunkshi: Kjo është një ngjarje e vonuar, ka fituar opoizita shqiptare, ka fituar PD. Të gjithë jemi dëshmitarë që përpara disa muajsh vetëm në sajë të punës këmbëngulëse u arrit që Bundestagu gjerman t’i adresohet Shqipërisë me 9 kërkesa. Vetëm në sajë të presionit të madh ndërkombëtar, u realizua dhe u bë e mundure që të gjitha palët që bien dakord dhe të ulen për zgjidhjen e kësaj krize. Ky hap është hapi i parë për të shkuar drejt zgjedhjeve të parakohshme, të lira dhe të ndershme.
Arben Rrozhani: Ju duhet të jeni në linjën e kryetarit Basha, por unë nuk ndaj të njëjtin mendim. Kjo është një fitore personale e Bashës, sesa do ta mbajë këtë fitore do ta tregojë koha. Sepse në të gjitha marrëveshjet mes Bashës dhe Ramës, ka fituar ky i fundit. Edhe 1 muaj dhe bëhet një vit nga djegia e mandateve. Çfarë u fitua?
Xhemal Gjunkshi: Unë thash që është fitore e opozitës, e të gjithë shqiptarëve. Ne kemi fituar shumë. Është sakrifica më e madhe që është bërë, dorëzimi i mandateve. Ne nuk jemi bërë aspak pishman për atë dorëzim mandatesh. Sepse ne i treguam opinionit publik dhe ndërkombëtarëve që situata në Shqipëri nuk është e qetë.
Arben Rrozhani: Për çfarë e bëtë gjithë këtë sakrificë? Me çfarë morali? Për t’u ulur prapë me Damian Gjiknurin?
Xhemal Gjunkshin: Kjo është pjesë e propagandës së Rilindjes…
Arben Rrozhani: Nuk është propagandë që pjesë e tryezës është edhe Gjiknuri.
Xhemal Gjunkshi: Një nga kërkesat e opozitës së bashkuar është gjithëpërfshirje për miratimin e reformës zgjedhore dhe që të zhvillohet jashtë Parlamentit procesi. Edi Rama mund të sjellë edhe një kriminel, edhe një person tjetër të dosjes për të qenë pjesë e tryezës. Por ne nuk mund të merremi me këtë. Ne do të merremi me produktin që do të arrihet.
