”Unë asnjëherë s’e kam mohuar që kanabisi është problem, të mendosh që ky aktivitet kriminal i sillka paratë në një kasafortë, është komplet naivitet”

Kryeministri i vendit Edi Rama pyetjes së gazetare Elona Meço përsa i përket parave të kanabisit dhe nëse a do përdoren për zgjedhjet  i është përgjigjur se asnjëherë s’e kam mohuar që kanabisi është problem. Sipas Ramës të mendosh që ky aktivitet kriminal i sillka paratë në një kasafortë, është komplet naivitet.

PYETJE-PËRGJIGJE:

Elona Meço: Bllofi i Bashës është qeveria teknike?

Edi Rama: Bllofi është ”ti do ikësh se do vimë ne” dhe gjithë lëvizja ka qenë e fokusuar te krijimi i një atmosfere psikologjike se populli është në çadër dhe jashtë çadrës është qeveria që i ka ditët e numëruar. Është bërë një përpjekje serioze për ta bërë këtë, duke mobilizuar disa zëra nëpër klubet e katundit mediatik, duke mobilizuar në letër dhe eter për të thënë edhe nesër edhe pasnesër. Bllofi nuk ka funksionuar, qeveria është këtu!

Elona Meço: Kanabisi…A mundet vlera e kësaj sasie të hyjë në zgjedhje?

Edi Rama: Ky është naivitet i madh ekonomik, të mendosh që ky aktivitet kriminal i sillka paratë në një kasafortë, është komplet naivitet. Unë asnjëherë s’e kam mohuar që kanabisi është problem.

Elona Meço: Reforma Zgjedhore dhe Vettingu, A mendoni se keni përgjegjësi që s’e keni pranuar atëherë propozimin e Lulzim Bashës?

Edi Rama: Nuk ka qenë për reformën zgjedhore, por muhabet për të larguar vëmendjen nga thelbi, që atëherë deri në 20 korrik nuk donin të votonin. E dini mirë këtë. Si votuan, pse votuan këtë e dinë mirë të gjithë. Në fushatë do ia tregoj të gjitha por sot do e ftoj Lulzim Bashën të mos dëgjojë Saliun por të drejtojë PD-në! 

(J.V/Shuplaka)